શ્રી મહાપ્રભુજીએ અષ્ટપ્રહરની સેવાનો પ્રકાર કર્યો છે.તેમાં સવારે મંગળાથી રાજભોગ સુધી અને સાંજે ઉત્થાપનથી શયન સુધીની સેવાનો સમાવેશ થાય છે.શ્રીઠાકોરજી શ્રીનંદરાયજીને ત્યાં નંદભવનમાં જે રીતે બિરાજતા હતા અને તેમની સેવા જે પ્રકારે થતી હતી તેજ પ્રકારે આ સેવાપ્રકાર શ્રીમહાપ્રભુજીએ અને ત્યાર પછી શ્રીગુંસાઈજીએ બતાવ્યો છે.આ સેવાપ્રકારમાં પ્રત્યેક સમયની સેવા પાછળ રહેલી પ્રભુની લીલાભાવના અને સેવામાં વપરાતા પ્રત્યેક પદાર્થ પાછળની ભાવભાવનાનો પણ સમાવેશ થાય છે. આ ભાવભાવનાથી સેવા કરવામાં પ્રીત અનુભવી શકાય છે.

જે વૈષ્ણવને શ્રીઠાકોરજીની સેવા કરવાની ઈચ્છા હોય તેમણે શ્રીનાથજીબાવાના ચિત્રજી અગર શ્રીલાલન [ શ્રી બાલકૃષ્ણજી શ્રીનવનીતલાલજી ] અગર શ્રી ઠાડુ સ્વરૂપ[ શ્રી ગોવર્ધનનાથજી શ્રી મદનમોહનજી શ્રી નટવરપ્રભુજી ] ઈચ્છા મુજબ સ્વરૂપ પધરાવવા હોય તો તેમણે શ્રી ગુરૂદેવ પાસે પોતાના શ્રીને પધરાવી પુષ્ટ [સેવ્ય] કરાવી આપશ્રીની આજ્ઞા પ્રમાણે શ્રીની સેવા કરવી.

પ્રથમ દરેક વૈષ્ણવે પ્રાતઃકાળે ઉઠતાની સાથે જ પોતાના કંઠમાંની તુલસીની કંઠીના શ્રધ્ધાપૂર્વક દર્શન કરવા જે ઠાકોરજીના ચરણારવિંદનું સ્વરૂપ છે.ત્યાર પછી શ્રીમહાપ્રભુજી, શ્રીગુંસાઈજી, શ્રીનાથજી, શ્રીયમુનાજી તથા પોતાના શ્રીગુરૂદેવનું સ્મરણ કરી ઘરમાં સૌ કુટુંબીજનોને ભગવદ્ સ્મરણ[જયશ્રી કૃષ્ણ] કરવા જોઈએ.

શ્રીહરિ - ગુરૂ - વૈષ્ણવનું સ્મરણ કરીને પોતાનું દેહકૃત્ય કરવું.પછી સ્નાન કરી સેવામાં વપરાતા રેશમી અથવા દરરોજ ધોયેલાં વસ્ત્ર [પુરૂષે ધોતીઉપરણોં બંડી અને સ્ત્રીએ સાડી] પહેરી ચરણામૃત લેવું.ચરણામૃત પહેલા મુખમાં પછી બન્ને આંખો ઉપર ગળા અને હૃદય પર લગાડવું.[વ્રજરજ શ્રીયમુનાજીની રજ અને શ્રીજીના સ્નાનનું જળ મળી ચરણામૃતના પેંડા તૈયાર થાય છે.] ત્યાર પછી પ્રસાદી કુમકુમથી કપાળમાં તિલકમુદ્રા કરવી અને સેવા માટે તત્પર થવું.આપણાં ઘરમાં પ્રભુ જ્યાં બિરાજતા હોય તે મંદિર ગોખલો અગર ઝાંપીજી હોય ત્યાં દંડવત્ કરી સેવા કરવાના સ્થાનને તથા નિજ મંદિરમાં સોહની[બુહારી] મંદિરવસ્ત્ર કરવું. સિંહાસન ખંડપાટ ચોકી સાફ કર્યા પછી શ્રીઠાકોરજી જ્યાં પોઢ્યા હોય ત્યાં શૈયાજીની બાજુમાં બિરાજતા સાજ માળા બીડાની થાળી બંટા ઝારીજી વગેરે સરાવી ઝારીજી બંટાજી પ્રસાદી રાખવાના સ્થાનમાં પધરાવી શુદ્ધ જળથી ખાસા કરવા. ગાદી અને તકીયા સ્વચ્છ કરી સિંહાસન ચોકી પર રાખવા.