જમણાં ચરણાવિંદમાં અગ્રભાગે ધ્વજનું ચિહ્ન છે જે દર્શાવે છે કે, 'શરણે આવેલાં સર્વ જીવોને પ્રભુ આ ધ્વજ નીચે અભય આપશે.' તેની નીચે અંકુશનું ચિહ્ન છે જે દર્શાવે છે કે, ભકતોના હાથી જેવા મદોન્મત ચિત્તને નાથીને પ્રભુ પોતાના હ્રદયમાં સ્થાન આપે છે. પછી કમળનું ચિહ્ન છે એ બતાવે છે કે ભક્તિરૂપી જળમાં રહેલા ભક્તોના કમળરૂપ હ્રદયને પ્રભુ ધારણ કરે છે .

શરણે આવેલા જીવના પાપ રૂપી તેમજ સંકટ રૂપી પર્વતોને પ્રભુ છેદી નાખે છે.

શરણે આવેલા જીવના સર્વ અમંગલ દૂર કરી તેના જીવનમાં મંગલ સ્વસ્તિક રચે છે.

શરણે આવેલા જીવને પ્રભુ આષ્ટકોણ ઐશ્વર્ય તથા અષ્ટસિધ્ધિનું દાન કરે છે.

પ્રભુને શરણે આવેલાને ધાન્યની કદી ખેંચ પડતી નથી.

પ્રભુને શરણે જનારની હંમેશા ઉર્ધ્વગતિ થશે.

પ્રભુના શરણે આવનારનો હ્રદયરૂપી કળશ સદાસર્વદા ભક્તિરસથી ભરપૂર રહેશે.

માતા સમાન પવિત્ર ગાયમાં જેમ સર્વતીર્થોનો વાસ છે. તેમ પ્રભુના ચરણકમળને શરણે રહેનારને સકળ તીર્થોની યાત્રાનું ફળ પ્રાપ્ત થાય છે.

પ્રભુના ચરણકમળ લૌકિક તેમજ અલોકિક એમ બન્ને પ્રકારની સંપતિ આપવાવાળા છે.

માનવીનાં માછલાં જેવાં ચંચળ મનને પ્રભુના ચરણાવિંદ જ સ્થિરતા પ્રદાન કરે છે

નમ્રતા તથા કાળનાં પ્રતીક રૂપ ધનુષ્યની જેમ પ્રભુના શરણમાં જનાર મનુષ્ય નમ્ર, વિવેકી અને વિનયી બને છે તથા કાળનું ચક્ર તેને બાધક બનતું નથી.

કામ, ક્રોધ અને લોભની ત્રિરેખાઓથી ઘેરાયેલા જીવના ત્રિદોષ દૂર કરીને પ્રભુ તેને નિજ શરણે રાખે છે.

આકાશની જેમ પ્રભુ શ્રીકૃષ્ણ સર્વાધાર અતિ સુક્ષ્માતિસુક્ષ્મ છે.